album-art

Gramsci “Un’omine una vida”

By
Release date:

I TESTI DEL CD

SU BATIZU

Su bintinoe ’e ennarzu in cattedrale

su norantunu Antoni an batizadu,

in Ales, mesu ‘idda l’at festadu,

in cussa die ‘e ierru manantiale,

finas a su Vicariu Generale,

pro s’ocasione aian invitadu,

totu at allistradu cussa ia

su pride in su registru ‘e sagrestia.

 

In pagos meses suni a sos adios,

sos Gramsci faghen torra sa tucada,

dae sa Marmilla buddida, assoliada,

Cicillu cun muzere e cun pipios,

in logu friscu, de buscos e rios,

faghen cuss’annu etotu s’arrivada,

in Sorgono set’annos sun restados,

e pois a Ghilarza sun torrados.

SA MALADIA

Faghimus unu brincu car’a infatu,

in su norantaduos est pitzinneddu,

in su ‘ighinadu ‘e Sorgono, Forreddu,

biven trancuillos, custu est unu fatu,

cando sutzedit unu disacatu:

Ninu s’intendet male, s’iscureddu,

intrat sa disaura in cussa domo,

pro babbu e mamma est unu mementomo.

 

Tomasa, baianedda, serbidora

in domo de sos Gramsci, cun Pepina

est ocupada in donzi faina

e atentzionat fizos e dimora,

in su chi b’at de fagher est totora

ben’apentada cussa muntagnina,

ma una die su fadu traessu,

si ponet dibetosu a su revessu.

 

Comente semper est a piga e fala

Tomasa, in su menzus tribagliare,

cun Antoneddu si solet giogare,

e lu tratenet, lu leat a pala,

sa die nde li ruet de s’iscala,

non l’ischit de su prantu acunortare,

de tando patit, giurat Pepina,

su male chi l’introtigat s’ischina.

 

Ma una ruta gai non podiat

causare cussu male permanente,

non fit a la chircare in s’incidente

sa neghe de su zumbu chi creschiat,

finas denanti apenas si bidiat,

segadu l’at su crescher de repente,

fortzis naschidu fit cun cussu male

chi atacat sa colonna vertebrale.

 

Morbo di Pott lu solen giamare,

cussu iscanidu e dolorosu male,

issu pertocat s’ispina dorsale,

l’atacat finas a l’mpiticare

arribat pasche pasche a consumare

cuddu moddore intravertebrale,

s’introtigat s’ischina che una corra,

e s’unfrat finamentras sa petorra.

MA COMENTE?

Ma comente si faede

a immentigae totu

finas a oe su chi ch’est istau ?

Forzis non nosi praghede

de su chi aus connotu

nudda chi potzad’esser ammentau,

in peruna materia?

Solu gana e miseria,

tristura e male in su tempus passau?

Epuru du ha’ cosas

chi depeus chistie, valorosas.

 

Sa limba sarda fiada

de totus foeddada

e rispetadas sas tradiziones,

sa campagna pariada

cun talentu pintada,

prena de cassighedda e de sirbones.

Oe a totu custu

non di leaus gustu,

sunti cambiaos tempos e persones,

e a innanti andaus

immentigando comente fiaus.

SAS LETURAS

Lezind’est impignadu,

in totas sas materias est un’assu,

nemos li tenet passu,

ca est de sa cultura innamoradu,

si no est ocupadu,

in class’est certu in calecunu zassu,

cun libros de ammentos

chi suni preferidos, sos apentos.

 

Pro libros e rivistas,

renuntziat finamentr’a mandigare,

e pro istudiare,

si bendet una part’e sas provvistas.

“pro me suni conchistas”,

Gramsci soliat narrer e pensare,

ma cando l’an ischidu

in domo l’assegundan su cumbidu.

 

“De fisicu tacadu,

des mandigare, e cosas de sustantzia,

est pagu sa bundantzia,

ma pane e aunzu mai t’at mancadu,

ca los bendes m’an nadu,

est un’insuportabile mancantzia,

tue pro una letura,

zaunas”, narat mamma, “una locura!”

 

“Peus est a sighire”

Cicillu narat nieddu che una fera,

“s’istampa furistera,

chi frade tou faghet recuire,

isco it’est patire,

chi finat a sa lestra cust’andera,

tue istudia ebbia,

rebeldes non de cherzo in domo mia!”

 

Pro non fagher chistiones,

Antoni a su postinu narat gai:

“S’ides fozos, arguai,

s’in manu a babbu o mamma che los pones,

mi bastan sos sermones,

faghe a manera chi non d’iscan mai,

tue a sa recuida,

los as a dare a mie acoa ‘e chida”.

LAMENTOS

Arrenegadu iscriet a su babbu,

pro su bestire, un’atera ia:

“L’ischis de ora ca est in finitia,

non portat mancu perunu grabbu,

si non lu cambio, ista ca a s’agabbu,

s’at a cunfunder cun sa carre mia,

est brutu e lisu, consumadu e feu,

e peus puru in pitzu meu.

 

L’ischis, in bidda, in su reposu,

ca abbarraia chidas sena ‘essire,

est ca non bos cheria isbregunzire,

bestidu male gai e sodrigosu,

mancari parzat eo so orgogliosu,

non cherzo chi mi potana sentire,

menzus in domo tristu e aggorradu,

che in ziru ma de totus lastimadu.

 

No ischis ancora, ti l’iscrio como,

oe non so andadu a iscola,

tenia sas crapitas sena sola,

aconzandelas so restadu in domo,

su chi ti naro, su chi ti fentomo,

est santa beridade, no est fola,

cumanda calecunu mastru ‘e pannos

pro mi bestire ca so in afannos.

 

TORINU

S’ambiente umanu ‘e s’universidade

resurtat pro Antoni istimolante,

b’at una zoventude palpitante,

intelletuales de arta calidade,

ziran ideas, pro sa beridade,

chi sun richesas pro donzi istudiante,

in cussos misturizos ideales,

b’at nordicos e b’at meridionales.

 

De s’omine s’istoria e su caminu,

fit sa passione sua prus alluta,

fit bona, pro s’allega, donzi iscuta,

esseret a istentu o a furinu,

esseret cun s’amigu o su bighinu,

issu, costante fit de bona muta.

“S’istoria est de sos omines su faru”,

meledaiat, “su menzus imparu!”

 

L’aggradat cun Togliatti s’arrejonu,

comintzan sos abbìtos in beranu,

si est de sa politica lontanu,

de umanos principios est padronu,

de sa parlata giara tenet donu,

omine de sentidos, a sa manu,

sos argumentos sun’in cantidade,

sos chi pertocan a s’umanidade.

 

Narat Palmiro de unu paragone:

“No est naschida s’isula famida,

richesa nd’at, est male dividida,

est tenta a tuju dae su setentrione,

si issos si che sutzan su cannone,

sa zente a sos congruos est sidida,

finas sa terra manna, rassa e rica

nudda produet sende assuta e sica.

 

Si esseren pro su populu isfrutadas,

sas minas dian campare sa Sardigna,

però si las passamus in rassigna,

a manos furisteras sun’andadas,

sa pisca in sas marinas fentomadas,

ingrassat zente anzena pagu digna,

pro casu, binu, peta, late e lana,

apena sa limusina bos dana.

 

Figura una funtana in d’un’altura

chi alimentat ortos e laores,

si l’iscaminan sos malifatores,

si sicat totu, est cosa segura,

e tando, no est curpa ‘e sa natura,

si semus agiumai pedidores,

si devet cust’andatzu bortulare,

su populu si det arrempellare”.

 

Mentres su nord est prosperu e atatu

su meridione est in s’iscurigore,

cun s’analfabetismu e su langore,

est reduidu aberu a malu tratu,

mentres s’istadu leat a baratu

sa Libia, che tirannicu invasore,

gastat in gherra fundos a porfia,

e non pro una giusta economia.

 

Sun de Antoni serios pensamentos,

infustos in sa vena ‘e su sardismu,

m’abbellabbellu est a su socialismu

ch’istrinat sos prus giaros sentimentos,

s’umanidade, si est in sos turmentos,

est neghe ebbia ‘e su capitalismu,

chi faghet semper fizos e fizastros,

e ingrassat de gherras e disastros

SOS ARREJONOS, SOS ARREJONOS

SOS ARREJONOS DE SU PENSADORE

SOS ARREJONOS, SOS ARREJONOS

SOS ARREJONOS DE SU PENSADO’

SU MUNDU MANNU E ORROROSU

Trintun’annu tenet Ninu

cando in Russia l’an giamadu,

cussu viazu l’at mudadu

totinduna su destinu.

 

S’in Torinu fritu est,

Mosca li ponet costadu,

est a inie destinadu,

Ninu, a s’Internazionale,

patit meda, istat male,

sa carena est a mortoriu,

tando in d’unu sanatoriu

est ca l’an ricoveradu.

 

Serebriani Bor it’est?

Cheret narrer “buscu ‘e prata”,

una clinica, est fata

pro sanare tantos males,

Ninu, chi est in sos sales,

non tenet ater’isetu,

ca su corpus in apretu

est aberu castigadu.

 

Connoschet una baiana,

Genia, in letu suferente,

bolscevica inteligente,

unu bellu disaogu,

bi at fortzis calchi isfogu

ma no est s’amore mannu,

no isetat manc’un’annu

nd’at un’atera in su sinu.

 

Una sorre prus minore,

Giulia, su coro l’abberit,

su sentidu nde possedit

est s’amante disizada

sa cumpanza e sa fada

chi mudadu l’at sa vida

sa muzere preferida

chi duos fizos l’at dadu.

 

Si nd’ammentat unu die,

cando lassat s’ispidale,

issu est tristu, mancu male,

li promitit sa torrada,

ma passende in cuss’istrada,

propiu in s’ora ‘e s’adiosu,

car’a su mundu orrorosu,

pariat cussu caminu.

L’at ammentada gai, fit puntada,

cun su bagagliu, in s’ora ‘e s’adiosu,

car’a unu mundu mannu e orrorosu.

AMORE LONTANU

Pensende jà sò a tie

recreu ‘e s’anima mia,

su coro est fritu che nie

ca non t’apo in cumpanzia.

 

Non timas prenda ‘e oro

si como non m’as presente,

ca t’apo sempre in sa mente

ti juto sempre in su coro.

 

Sas oras parente dies,

sas dies annos intreos,

e pianghen sos ojos meos

mancari chi non los bies.

 

Eo non de bio s’ora

de nos torrare a unire,

ca non cherzo pius sufrire

pensende a tie chi ses fora.

 

Es’ dolorosu pro me

ancora a biver lontanu,

ti cherzo istringher sa manu

e biver sempre cun te.

 

O Julka, eo cherìa,

eternamente restare

acanta e te’ pro ti amare

pro tota sa vida mia.

SA TORRADA

Maltratu a s’arribada

ma ch’andat ch’est in disisperu e dolu,

ca no at su cunsolu,

d’esser cun Giulia acanta, s’amorada,

a Vienna est sa puntada,

bi restat pagos meses, solu solu,

pois podet torrare,

l’an’elegidu, est parlamentare.

 

Agatat su fascismu

s’est fatu mere a forza ‘e sa nazione,

dominan sa reazione,

istragos, atentados, iscuadrismu,

regnat su pessimismu

est atrudida sa populazione,

sun’abbolotos mannos

an a durare una binten’e annos.

 

Serrana sos giornales,

partidos, sindacados, a porfia,

est sa democrazia

fat’a bisera dae sos fundales,

ma cussos criminales

superan su dimoniu in marrania,

si a Matteotti puru,

l’impostan e lu ‘ochini, s’iscuru.

 

Cando in Parlamentu

faeddat Gramsci, meda est s’atenzione,

faghet unu sermone

chi est de sos annales in ammentu,

pecadu, no at tentu

in vida sua un’atera ocasione,

su Duce, incrudelidu,

l’arrestat innotzente e l’at bochidu.

 

Comintzat su calvariu

in sas prejones de su continente

intrat chi est suferente,

nd’essit in su baulu mortuariu,

ma s’astru visionariu

abbarrat in memoria eternamente,

e chie l’at cundennadu

est e at a esser semper esecradu.

LASSA SA FIGU PUZONE

LASSA SA FIGU PUZONE

LASSA SU DDA BICULAE

SI FIGU CHERES PAPAE

PRANTADINDE UNU PRANTONE.

 

Millu millu su sirbone

a sa mela est sa puntada,

cheres una fusilada

o ti fuis che saeta?

Cussa mela in sa sacheta

che la ponzo deo como,

sos eritzos apo in domo,

suni sena mandigae.

 

Sintzigorru lassa istae

sa latuca, ite ti cres,

apo tostoinos tres,

est a issos destinada,

mi, sa pudda est gia’ puntada,

ti che mandigat deretu,

o ti cuas, e chietu,

suta de cussu muntone.

 

Oh su ‘atu, non ti sonnes

de mi faer s’intrallatzu,

ca su sorighe in su latzu

est po sa corranca mia,

bae e curre in sa ia,

cricadinde si nde cheres,

seberadi ateros meres,

o giaunu as a abbarrae.

 

Tziligheta abbarra firma

totu s’ora ses a runda,

ca ti ch’eto cun sa frunda,

e ti giao a s’istoritu,

tenet bonu s’apetitu,

e no est un’iscoberta,

ma est fissu a buca aperta,

non ddu potzo poderae.

 

LASSA SA FIGU PUZONE

LASSA SU DDA BICULAE

SI FIGU CHERES PAPAE

PRANTADINDE UNU PRANTONE

GOCIOS

PENSADORE INTELLETUALE

DE ARTISSIMA ISTATURA,

ISCRITORE UNIVERSALE

IN S’OLIMPU ‘E SA CULTURA.

 

Una vida suferente

cun s’ischina introtigada,

s’esistentzia tribulada,

sa miseria in zoventude,

e sa diliga salude,

sa cudrele prejonia

sa fascista tirania

che l’an postu in sepultura.

PENSADORE INTELLETUALE

DE ARTISSIMA ISTATURA

 

Una debile carena

tanti gosos l’at brivadu,

in sos zogos l’t frenadu

ma no in sa fantasia,

sa famada bramosia

de connoscher e ischire

l’at azuadu in su patire,

dadu forza in sa tortura.

ISCRITORE UNIVERSALE

IN S’OLIMPU ‘E SA CULTURA.

 

A pitzinnu, in zoventude,

sos orizos suni sardos,

pois mudan sos traguardos,

a sos binti est in Torinu,

naschet un’ateru Ninu,

iscritore e giornalista,

desempladu socialista,

nobilissima figura.

PENSADORE INTELLETUALE

DE ARTISSIMA ISTATURA

 

Fundat a sos bintinoe

su partidu comunista,

est de bundu un’ativista,

singulare dirigente,

istudiosu cumpetente,

ostinadu unitariu,

in tres annos segretariu

est de massima istatura.

ISCRITORE UNIVERSALE

IN S’OLIMPU ‘E SA CULTURA.

 

A trintunu in Russia est

e connoschet sa muzere,

su sentidu, su praghere,

mudat fozu cussa vida,

como nessi est dividida

in politica e amore,

duos fizos a primore

los istimat cun ternura.

PENSADORE INTELLETUALE

DE ARTISSIMA ISTATURA

 

Mancat pagu a trintasese

cando Antoni est arrestadu,

su fascismu l’at firmadu

in su corpus aflizidu,

ma sa mente at parturidu

milli ideas geniales

benes oe universales

de onzi umana criadura.

ISCRITORE UNIVERSALE

IN S’OLIMPU ‘E SA CULTURA.

 

L’ana mortu in s’agonia,

unu corpus castigadu,

ma de issu est abbarradu

su pretziosu pensamentu,

su fascismu it’at otentu,

cundennadu est de s’istoria,

Gramsci imbetzes in sa gloria

gosat fama imperitura.

PENSADORE INTELLETUALE

DE ARTISSIMA ISTATURA,

ISCRITORE UNIVERSALE

IN S’OLIMPU ‘E SA CULTURA.

MUTOS

Cherian proibire

a su cherveddu sou

bint’annos de pensare.

Cherian proibire

Non l’est andadu a prou,

non si poden ligare

s’istudiu e su ischire.

 

Pitzinnos istudiade

ca tenimus bisonzu

de totu sa cultura.

Pitzinnos istudiade

Eo so testimonzu,

si b’est sa ditatura

non b’est sa libertade.

 

Odio s’indiferentzia,

unu vitziu metzanu,

che una maladia.

Odio s’indiferentzia

Eo so partigianu

semper in prima ria

in lota e resitentzia.

 

Sa classe proletaria

si chircat s’unidade

si giogat sa partida.

Sa  classe proletaria

Sa santa beridade

virtude est nodida

e rivoluzionaria.

S’INDIFERENTZIA

Iscriet puru de s’indiferentzia,

che una mata mala ‘e che ‘ogare:

“It’est sa vida sena s’impegnare

pro mezorare sa nostra esistentzia?

 

S’omine aberu, s’omin’e cuscentzia

no est su chi si solet apartare,

bivo, bivimus prenos de ardore

pro sa tzitade de su benidore!

 

IN SA TZITAD’E SU BENIDORE

DONZI PERSONE EST IMPREADA

MANC’UNA IN SEGUS EST ABBARRADA,

NESCIUNU TIMET FRITU O CALORE.

 

Su biver est a esser partigianu,

e non s’agatat chie est omine ebbia,

chie bivet in tzitade, in cumpanzia,

no est istranzu, cussu est s’arcanu,

 

e chie non leat parte est remitanu,

si magat de sa peus marrania,

s’indiferentzia est parassitismu,

su esser disganadu, est egoismu.

 

S’INDIFERENTZIA EST PARASSITISMU,

SU INTRARE IN PARTE EST UNU GOSU,

ISTAT A BANDA SU MANNIOSU,

E ISTARE A BANDA EST EGOISMU.

 

B’est chie bivet semper lamentosu,

e chie irrocat si non b’at rejone,

est raru deaberu in su muntone,

cuddu chi si preguntat curiosu:

 

 

Fat’apo su dovere virtudosu,

pro ider coment’andat sa chistione?

Comente diat esser custa ia

si dia aer fatu a voluntade mia?’

 

EO PONZO SA VOLUNTADE MIA

GASTO SU TEMPUS, INTRO IN PELEA,

MI LA DIFENDO SI APO S’IDEA,

A ISTARE MUDU NO EST BALENTIA.

 

In pagos si preguntan cuss’arcanu,

sos chi umiles chircan sa cuscentzia:

est custu su valor’e s’esistenzia,

comente devet esser su cristianu?

 

Det esser, torro a narrer, partigianu,

e inimigu de s’indiferentzia,

s’indiferentzia che una maladia,

una ‘e sas peus, est pro parte mia”.

 

PRO CONTU MEU UNU CRISTIANU

BI DEVET PONNER TOTU S’ARDORE

PRO SA TZITAD’E SU BENIDORE,

SI IN CORO SOU EST PARTIGIANU.

 

Det esser, torro a narrer, partigianu,

e inimigu de s’indiferentzia,

s’indiferentzia che una maladia,

una ‘e sas peus, est pro parte mia”.

 

BI DEVET PONNER TOTU S’ARDORE

PRO CONTU MEU UNU CRISTIANU

SI IN CORO SOU EST PARTIGIANU

PRO SA TZITAD’E SU BENIDORE.